Tegen bêrretied
begunt t gedribbel,
eerst was t geluud van ain
mor ien n week tied
is er nait meer allain,
boven woar wie nusseln
goan ze t maist tekeer,
den staarft t wat vot,
mor ze kommen weer
as wie zowat
vertrokken bennen.
Kat steurt zich naargens aan,
oren kommen nait ains ien t enne
en noast mie blift t noa de
poar luusternachten ook stil.
t Begunt host al te wennen,
t heurt er al n beetje bie,
mor t woord 'moesstil'
wil der nait ien bie mie.
Coby Poelman-Duisterwinkel
http://dichteningroningen.blogspot.com