Op e kneikes zit er veur
het deur rubber omrande glas
te kieken noar mien biezundere was
en zicht hoe ien t schumend sop
zien rubberen steveltjes op e kop
aal ien e rondte draaien
en tegen mien pantoffels aaien.

Hai volgt zien steveltjes op de voet,
van zien voetjes zug k enkel zien toontjes,
den strekt er zien sloapende bointjes
en kiekt riekhaalzend toe
hoe ik het deurtje opendoe,
zien steveltjes volprop met stukken krant,
zien knoesjes drukken tegen mien hand.

Nou, ruum twintig joar loater
stoan zien reuzestevels op een krant
te soppen van het woater.

http://dichteningroningen.blogspot.com